KFC va Pepsi: butun bir davr yakuni — KFC Coca-Colaʼga oʻtmoqda

2027-yilning yanvar oyidan boshlab AQShdagi KFC restoranlari Pepsi bilan 40 yillik hamkorlikdan soʻng Coca-Cola ichimliklariga oʻtishni boshlaydi. Tahlilchilarning baholashicha, boy berilgan shartnoma tufayli PepsiCo yiliga taxminan $500 mln qiymatdagi savdo hajmini yoʻqotadi.

Qizigʻi shundaki, bir vaqtlar KFC, Pizza Hut va Taco Bell tarmoqlariga PepsiCoʼning oʻzi egalik qilgan edi, endi esa tarmoq uning asosiy raqobatchisiga oʻtib ketyapti. Kutilmagan holat!

Nima oʻzgaradi?

• KFC bu haqda 2026-yil 15-oktabrda eʼlon qildi.
• Oʻtish 2027-yil yanvarida boshlanadi, bahorga qadar AQShdagi barcha KFC restoranlarida (taxminan 3 700 ta) Pepsi oʻrniga Coca-Cola ichimliklari boʻladi.
• Shu bilan 1986-yildan beri davom etgan eksklyuziv hamkorlik yakunlanadi.

40 yillik tarix qisqacha

PepsiCo KFCʼni 1986-yilda sotib olgan va oʻshandan beri AQShdagi restoranlarda faqat Pepsi ichimliklari sotilgan. Oʻsha davrda kompaniyaga Pizza Hut va Taco Bell ham tegishli edi. 1997-yilda PepsiCo restoran biznesini alohida kompaniyaga ajratdi — bu bugungi Yum! Brands. Ajralishdan keyin ham KFC yana deyarli 30 yil Pepsi bilan ishlashda davom etdi.

PepsiCo uchun bu qanchalik katta yoʻqotish?

Tahlilchilar yoʻqotilgan shartnomani yiliga taxminan $500 mln savdo deb baholamoqda. Bu PepsiCo uchun nafaqat pul, balki obroʻ masalasi ham: AQShning eng mashhur fastfud tarmoqlaridan biri endi asosiy raqobatchining ichimliklarini sotadi.

Oʻzbekistondagi KFCʼga taʼsiri bormi?

Hozircha yoʻq. Qaror faqat AQShdagi restoranlarga tegishli: boshqa mamlakatlarda PepsiCo KFCʼning hamkori boʻlib qolmoqda, xalqaro restoranlar boʻyicha shartnomalar yaqinda yangilangan.

Oʻzbekistondagi KFC haqida koʻproq bilmoqchimisiz? Oʻqing: KFC — Oʻzbekistondagi ilk trillioner restoran. Restoran va yetkazib berish xizmatlari uchun eng soʻnggi chegirmalarni esa Oziq-ovqat promokodlari boʻlimida kuzatib boring.